ચૂકી જવાયું છે.....

દિલાસો આપવાનું આખરે ચૂકી જવાયું છે,

હૃદયને ઠારવાનું આખરે ચૂકી જવાયું છે.

તને, લે દોરવા બેઠો અહીં હું મુજ અહમ્ લઈને,

હતું જે ત્યાગવાનું આખરે ચૂકી જવાયું છે.

બીજાને જાણવામાં જિંદગી આખી ગઈ છે દોસ્ત,

ને ખુદને જાણવાનું આખરે ચૂકી જવાયું છે.

તેં ફેલાવ્યો પ્રણયનો હાથ પણ; સમજી શક્યો ના હું,

હથેળી ચૂમવાનું આખરે ચૂકી જવાયું છે.

વહે છે ગૂંગળાઈને હજીયે બંધનોના નીર,

કિનારા તોડવાનું આખરે ચૂકી જવાયું છે.

જઈ પાલવ સુધી એના, પવન ભીનો થયો છે આજ,

એ આંસુ રોકવાનું આખરે ચૂકી જવાયું છે.